ئارەزووکردن*

 

 

 

 

هیچ شتێ نیە ئەوەندەى ئارەزووکردن (Desiring) سادە و مرۆکرد بێت. ئەى کەوایە بۆچى ناتوانین ئارەزووەکانمان دەرببڕین؟ لەبەرچى هێند قورس دەخرێنە چوارچێوەى وشەوە بۆمان؟ هێندە قورس، ئاقیبەت دەیانشارینەوە، و لە ناخماندا گۆڕە بەردینەیەکیان بۆ هەڵدەکەنین، ئارەزووەکان لەوێدا مۆمیادەکرێن و بان دەدرێن، هەڵپەساردە و چاولەڕێ دەمێننەوە.

ئێمە ناتوانین ئارەزووەکانمان بە زماندا بێنین، چونکە [تەنیا لە زەینماندا] وێنایان‌دەکەین. گەر ڕاست بڕۆین گۆڕەکەى ناخمان بێ لە بڕێک وێنە هیچى ترى تیا نیە. چەشنى ئەو کتێبە وێنەدارەى وا بۆ مناڵانێک چاپدەکران هێشتاکە فێرى خوێندنەوە نەببوون، چەشنى وێنەکانى "دێپیناڵ" کە بۆ نەخوێندەواران چاپدەکران. لەش‌وپەیکەرى ئارەزوو، لە وێنەیەک پێکهاتووە. ئەوەشى لە ئارەزوودا نایەتەگۆ، وێنەیەکە هەر لە ئارەزوو بۆ خۆمانمان کێشاوە.

درکاندنى ئارەزووەکانمان لاى کەسانى تر بێ یاریدەى وێنەکان، کارێکى کێوى و کاڵفامانەیە. درکاندنى وێنەکانیشمان بەبێ ئارەزوومان شتێکە مرۆ تووشى داهێزران دەکات (وەک گێڕانەوەى ئەو خەونانەى دیومانن یان ئەو سەفەرانەى کردوومانن). بەڵام ئەم دووانە، هەردووکیان ئاسانن. ئیشە هەرە قورسەکە، ئارەزووە وێناکراوەکان و وێنە ئارەزووکراوەکانە. هەر لەبەر ئەمەیشە، شتەکە دوادەخەین. دواىدەخەین بۆ ساتەوەختێک کە وردەوردە تێدەگەین ئارەزوومان بۆ هەتاهەتا بە وەدینەهاتوویی دەمێنێتەوە، تێشدەگەین ئارەزووە دەرنەبڕاوەکە هەر خۆمانین، ئێمە بۆ هەمیشە زیندانى گۆڕەکەى ناخمانین.

مەسیحا، بە پیریی ئارەزووەکانمانەوە دێت. مەسیحا، ئارەزووەکانمان (مرازەکانمان) لە وێنەکانمان جیادەکاتەوە بۆ ئەوەى بیانهێنێتەدى (حاسڵیان بکات). یاخۆ واى بنوێنێت پێشتر بەدیهاتوون. ئێمە وێنا/وێنەى هەرچیمان کردبێت، پێشوەخت کردوومانە بە هی خۆمان. دەمێنێتەوە وێنەى -وەدینەهاتوو-ـى ئەو شتەى پێشتر بەدیهاتووە. مەسیحا هەر بە ئارەزووە بەدیهاتووەکانمان، دۆزەخێکمان بۆ دەم‌دەدات، بە وێنە بەدینەهاتووەکانیش بەرزەخێک. بە ئارەزووە وێناکراوەکانیش، بە وشەى پەتى، خۆشبەختییەکى بەهەشتى.       

 

 

جۆرجیۆ ئاگامبێن

و. وەلید عومەر

 

* کوڵەبابەتێک لە کۆمەڵەوتارى "پیرۆزى بەزێنییەکان (بێ ڕێزیکردنەکان)"